జైలర్ సినిమాతో భారీ విజయాన్ని సొంతం చేసుకున్న సూపర్ స్టార్ రజనీ కాంత్ వరుస సినిమాలతో బిజీగా ఉన్నారు. రజనీ కాంత్ హీరోగా ప్ర‌ముఖ నిర్మాణ సంస్థ లైకా ప్రొడ‌క్ష‌న్స్ బ్యాన‌ర్‌పై రూపొందుతోన్న మరో భారీ బ‌డ్జెట్ చిత్రం ‘వేట్టైయాన్ – ది హంటర్’. జై భీమ్ దర్శకుడు టి.జె.జ్ఞాన‌వేల్ ఈ సినిమాను తెర‌కెక్కిస్తున్నారు. బ్లాక్ బ‌స్ట‌ర్ చిత్రాలు 2.0, ద‌ర్బార్‌, లాల్ స‌లామ్ వంటి చిత్రాల త‌ర్వాత ర‌జినీకాంత్, లైకా ప్రొడ‌క్ష‌న్ష్ క‌ల‌యిక‌లో రాబోతున్న నాలుగో సినిమా ‘వేట్టైయాన్- ది హంటర్’. ఈ సినిమాలో ఎన్‌కౌంటర్ స్పెషలిస్ట్‌గా రజనీకాంత్‌ కనిపించనున్నారు. అమితాబ్‌, ఫహద్‌ ఫాజిల్‌, రానా, మంజు వారియర్‌, రితికా సింగ్‌, దుషారా విజయన్‌ కీలకపాత్రలు పోషించారు. వేట్టైయాన్ అక్టోబర్‌ 10నపాన్‌ ఇండియా స్థాయిలో గ్రాండ్ గా విడుదల కావడానికి సిద్ధంగా ఉంది. ఇప్పటికే ఈ సినిమా నుంచి విడుదలైన పోస్టర్స్, ప్రివ్యూ వంటివి సినిమాపై భారీ ఆసక్తిని నెలకొల్పుతున్నాయి.
ఈ నేపథ్యంలో చిత్ర ప్రమోషన్స్ జోరు అందుకున్నాయి. వరుస ప్రమోషన్లతో రజనీ బిజీగా ఉన్నారు. తాజాగా ఆయన్ని పలువురు విలేకర్లు సంప్రదించి సినిమా విషయాలు అడిగి తెలుసుకున్నారు. ఈ నేపథ్యంలో ఒక విలేకరి.. ‘‘తిరుపతి లడ్డూలో కల్తీ జరిగిందంటూ వార్తలు వస్తున్నాయి. దానిపై మీ అభిప్రాయం ఏమిటి?’’ అని ప్రశ్నించింద. దానికి సూపర్ స్టార్ బదులిస్తూ… ‘సారీ.. నో కామెంట్స్‌’ అని అక్కడినుంచి వెళ్లిపోయారు. ప్రస్తుతం ఈ వీడియో నెట్టింట వైరల్‌గా మారింది.
కాగా, లడ్డూ వివాదం దేశవ్యాప్తంగా చర్చనీయాంశంగా మారిన సంగతి తెలిసిందే. గత ప్రభుత్వ హయాంలో శ్రీవారి లడ్డులో స్వచ్ఛమైన నెయ్యికి బదులు జంతువుల కొవ్వును వాడారని ప్రస్తుత ప్రభుత్వం ఆరోపణలు చేస్తుంది. తిరుమల లడ్డు కల్తీ జరిగిందనే ఆరోపణల నేపథ్యంలో ఏపీ డిప్యూటీ సీఎం పవన్ కళ్యాణ్ 11 రోజుల ప్రాయశ్సిత దీక్ష చేపట్టిన సంగతి తెలిసిందే.
